Kabaneri Of The Iron Fortress Review

Kyuki abhi iss anime ka sirf ek hi episode aaya hai isliye poori series ke baare me abhi to nahi keh sakte hai par abtak jo dekhne ko mila hai wo kaafi amazing hai isliye beshak ye series dekhne laayak hai agar aapko Attack On Titan pasand aaya ho to. Ye show hindi fansub me bhi available hai isliye naa dekhne ki koi wajah hi nahi bachi hai abto. Visit for hindi sub - http://hindisubanimes.blogspot.in/2016/04/kabaneri-of-iron-fortress.html

Kai log isey Attack On Train bhi kehne lage hai kyuki agar aapne iska trailer tak bhi dekho hoga to bhi aap samajh hi gaye hoge ki isme jo Kabane hai wo bilkul Titans aur zombies ka mixture hi hai halaaki fir bhi wo kaafi had tak daraawne aur interesting zaroor lagte hai,

Main character Ikoma bhi kamaal ka hai balki ye kehna galat nahi hoga ki wo kai maayno me Eren se bhi thoda bahot better hi hai par fir bhi pehle episode me kai cheeze Attack On Titan ke pehle episode jaisi hi thi isliye kuchh points kaafi predictable thay par ye sirf pehla hi episode hai isliye aagey jaake umeed hai ye aur bhi original ho sakta hai.

Ye hai kabane! 

Animation Quality beshak kamaal ki hai jaisa ki Wit Studio aur Attack On Titan banaane waalo se umeed thi

Ye hai main hero jo shaayad aapko Eren se bhi behtar hi lag sakta hai!

Aur haa har episode poora dekhne ke baad intezaar karna mushkil ho jaata hai agle episode ka.

Alto's Adventure Hai Ekdum Endless Visual Treat For Mobile Gamers

Apple iphone users ke pass to ye pichhle saal ki february se hi tha par android users ko ye jhakaas graphics waala game ab jaakar ke naseeb hua hai 11 february 2016 se. Par jo bhi ho der aaye durust aaye aur android par ye free release hua hai isliye iphone users ki tarah hume kuchh chukaana bhi nahi pad raha hai, Wo baat alag hai ki free hone ki wajah se hume in-app purchases aur ads ka saamna karna padega par don't worry kyuki wo sab gameplay ke beech me nahi aata hai aur ek ad dekhne ke baad aapko ek mast jeevandaan mil jaata hai joki i liked a lot.

Ab baat karte hai iske sabse best aspect ki aur wo hai iske mast graphics. Iske graphics ekdum kamaal ke hai aur sirf iski scenery ko nikhaarte rehne me hi game nikal jaata hai aur aapko pata bhi nahi chalta hai. Ek taraf game chalta hota hai aur dusri taraf background me day aur night cycle jiske beech ka transition ekdum real life jitna hi sundar hai.

Graphics to mast hai par gameplay-wise zaroor isme innovation ki kami hai kyuki iss maamle me ye baaki ke endless runners jaise ki jet pack joyride aur isi tarah ki baaki ke clones jaisa hi hai. Jabtak ho sake bhaagte raho aur jab maro to ya to keemat chukaao ya fir dobaara se bhaagna shuru karo. Isi sabke beech aapko kuchh missions milenge jinhe poora karke level badhenge aur achievements to hai hi hai. Par fir bhi ye ek ski-ing game hai jiske atmosphere me khone se aap khudko bilkul bhi nahi rok paaoge isliye thodi bahot unoriginality ko maaf kiya jaa sakta hai.

Finally meri taraf se Alto ke iss amazing visually appealing adventure ko milta hai jhakaasness ka thappa aur isey abhi download karke maze lo aur dosto ke highscore ko beat karo aur dum hai to mera waala bhi.

Links -

Apple Appstore

Google Playstore

Article By - Boss Fire

Hot Agni Fire ka Anime Recommendation

Hot Agni Fire ki taraf se iss week ka anime recommendation hai...

Ye anime ek tarah se do genres ka mixture hai kyuki isme jo duniya dikhayi gayi hai usme jaadu aur science dono hi sach hai aur dono ek dusre ke dushman bhi hai. Isliye aap isey sci-fi fantasy keh sakte ho. Thodi bahot fan service bhi hai aur isme characters bhi totally likable hai. Internet me isey kaafi average reviews diye gaye jinse mai bilkul bhi agree nahi karta well ho sakta hai ki maine itne jyada animes nahi dekhe isliye mujhe aisa naa laga ho par jo bhi ho mujhe ye bahot pasand aaya aur aapko bhi beshak aayega. 

Asli mazaa shuru hota hai 5th episode se. Vaise to shuru se hi mazaa aata hai par jyadatar animes ki tarah uske mood me baithne tak thoda time to lagta hi hai aur end tak pahochne ke baad aapko itna mazaa aa chuka hoga ki shaayad hi hoga ki aap iski second season turant naa dekho.

Iska Soundtrack bhi ekdum mast hai. Pehli baar sunne me bhale thoda ajeeb lage par 3 se 4 baar sunne ke baad shaayad ye aapke top 5 favourite songs me bhi aa hi jaayega. Sirf 24 episodes hai isliye koi jyada time bhi nahi lagega poora dekhne me.

Animations bhi ekdum badhiya hai aur detailed bhi.

Isme story hai Touma ke baare me joki Academy City me rehta hai aur uski kismat ekdum bekaar hai. Academy City rehne waale 80% log espers hai matlab ki wo students jinke pass psychic powers hai jinhe wo yahaa rehkar behtar karte rehte hai. Touma ke right hand me kisi bhi tarah ki energy ko bekaar karne ki taaqat hai fir chahe wo jaadu hi kyu naa ho. Fir uski mulaakat index se hoti hai jiske pass photographic memory hai matlab ki wo ek baar jo bhi dekhle usey fir kabhi nahi bhoolti aur uski memory me kareeb 300 kitaabey hai joki khatarnaak jaadu ke baare me joki agar koi insaan padhle to uska dimaag kharaab ho sakta hai.... 

To isi tarah ki story hai joki ekdum mast fight scenes se bharpoor hai aapko isme pakka hi mazaa aayega to dekhna zaroor.....

Ye english dub aur sub dono me hi available hai aur dono hi version ekdum mast hai to aap jo chaho dekh sakte ho. 

Agnirated - 8.5

Article By - Boss Fire

The Walking Dead Season 1 {The Game}

Yes, waakei isey bahot saare game of the years award mile hai!

Genre - Interactive Adventure

Ab iss amazing game ke baare me kya kahuu! Upar poster par jo likha hai wahi kaafi hai ye bataane ke liye ki ye bahot hi jyada mast hai. Ye itna mast hai ki isey Game of The Year award tak mila tha 2012 me. Haa ab to thoda puraana ho gaya hai ye game aur isliye its possible ki aaplog isey abtak khel bhi chuke hoge shaayad par kyuki mujhe yahaa jyada se jyada best games ki info share karni hai sabke saath to bina iss game ki baat kiye ye kaam poora nahi ho sakta. Aur haa ye game ek American Comic par based hai jispar ki isi naam ki ek aur Live Action TV series bhi based hai. Maine TV series se pehle game khela aur I am glad jo aisa kiya kyuki Game me alag characters hai isliye Game ki story samajhne ke liye TV series ya comic padhne ki zaroorat bilkul bhi nahi hai. Aur iski story ekdum badhiya hai aur end me to aap bina roye reh hi nahi paaoge.

Story

Sabse pehle baat karte hai iske best element ki aur wo hai story. Ab history me jaa chuke hai wo din jab log kehte thay ki video games me achchhi story ki umeed karna hi bekaar hai. Video Game me bas ulloo panti hoti hai jisey karne me bas mazaa aana chahiye aur sabkuchh jaaye bhaadme. Ab aisa nahi hai. Aajkal ke latest games ne saabit kardiya hai ki Video Game ek art form hai jisme interaction ke saath saath hume ek adventure for ages bhi mil sakta hai. Iski story hai Everett Lee ke baare me joki jail me le jaaya jaa raha tha ki tabhi duniya me zombie apocalypse shuru ho gaya aur marey log zinda hoke zinda logo ko khaane me lag jaate hai. Iss sabke beech Lee ko zindgi ek aur mauka deti hai apni galtiya sudhaarne ki jab wo Clementine se milta hai ek chhoti si ladki joki akele iss duniya me beshak nahi jee sakti. Ab aur jyada bataane ka matlab hai spoiler deke mazaa kharaab karna joki mai nahi karoonga. Bas aap ye jaanlo ki story ke maamle me aap iss game se koi shikaayat kar hi nahi sakte. Aur wo ending....{Crying}

Gameplay

Ab kyuki ye ek adventure game hai aur iska sabse strong point kyuki story hai isliye gameplay bhi iska ek adventure style ka hi hai. Mostly puzzle element se bhara aur puzzles bhi itna mushkil nahi ki aapko jyada akal lagaani pad jaaye. Bas apna average human akal istemaal karte rehna aur aapko koi bhi dikkat nahi hogi. Ek interesting part ye zaroor hai gameplay me ki kahaani me aapko ekdum asli insaan ki tarah choices banaani padengi aur aage ki game ki story aapki ki hui choices par depend karengi aur bas yahi hai mere dosto wo cheez jo isey itna jyada awesome banaati hai. aapko turant hi faisla karna hoga ki aap kisey bachaana chahte ho, aap kisey khaana dena chahte ho, aap kisey naaraaz karna chahte ho aur aise hi bahot se aur haalaat. Aur har haalaat me choice karna beshak bahot mushkil hota hai.

Graphics

Iske graphics anokhe tarah ke hai jinki wajah se ye game boodhaa[aged} nahi hoga aur aagey samay me kabhi bhi iss game ko khela jaa sakega aur iske graphics tab bhi utne hi mast lagenge jitne ki abhi hai. Cel-shaded graphics ki yahi khaasiyat hoti hai. Halaaki ki kuchh logo ko zaroor iss tarah ke graphics bekaar lag sakte hai par ye uss game ki awesomeness ke beech nahi aatey isliye kise parwah hai.

Final Verdict

Ye game itna mast hai ki mai yahi kahunga ki aap isey abhi download karke khelke mazaa le aur baadme comment me aakar kahe ki maza aagaya khelke. Aur haa end me khudki bhaavnaao ko beh jaane dena ok dosto. Ye har platform par available hai isliye chahe aapko ye pakka hi khelna padega.

Agnirated - 10/10

Top 5 Anime Super powers Showdown

Top 5 Anime Superpowers ke beech ek zabardast clash hone waala hai aur aapki voting decide karwaayegi ki konsi hai sabse best. Inn superpowers ko kisi bhi basis par choose kiya jaa sakta hai. Aapko inme se jo power pasand ho aur jise aap jitaana chahte ho iss war me uske liye vote kariye aur apne dosto ko bhi kahiye vote karne ke liye aur please isey yu hi mat jaane dena warna kahi aapki favourite super power haar na jaaye. Yahaa mauzood saare animes hindi fansub me bhi available hai. 

Nominations

Iss yudh me jo super powers bhidne waali hai wo hai-

Death Note - The notebook of Death Note

Ye wo notebook hai jisse shaayad aap dur hi rehna chahoge kyuki ye sach ho ya naa ho par iska jo kaam hai wo kaafi controversial hai. Death Note anime dekhke inspired kai logo ne real me ek death note me apne teachers ka naam bhi likh diya tha jiske baad beshak unhey school se nikaal diya gaya tha aur iss anime ko ban kardiya gaya. To yahi hai taaqat death note ki ek aisi notebook jisme jiska bhi naam likha hoga wo mar jaayega. Anime series me death note se jude kai facts hai jinhe mai yahi bataakar mazaa kharaab nahi karne waalaa kyuki ye anime one of the best anime hai jo aap kabhi dekhoge. Dragon Ball aur Pokemon to sab jaante hai par har asli anime fan Death Note ke baare me jaanta hai aur kai anime fans shaayad isey hi vote de kyuki issey hum bina pakde jaaye duniya ko rehne ke liye ek behtar jagah banaa sakte hai. Wo alag baat hai ki ek L naam ka champu tumhe rokne ki kosis karega aur aagey jaake main hero bhi ban jaayega. Darasal Death note ki shakti yahi hai ki har koi usey ek naa ek baar try zaroor karna chahta hai jaisa ki anime ke pehle episode me Light khud bhi kehte hai. Par jaisa ki Light ke father kehte hai ki kisi ko maarne ki taaqat ek curse ki tarah hoti fir chahe tum uski madad bhale dusro ki bhalaayi ke liye hi kyu naa karo. Aur death note ko istemaal karne waala shaks poori eternity ke liye naa to narak me jaa sakta hai aur naahi swarg.

Note - Please aap asli death note ke chakkar me naa pade. Bas chup chap ye best thriller anime dekhke maze le aur so jaaye.

Naruto - Sharingan eye bloodline trait

Sharingan hai Uchiha Clan ki shaan. Sharingan ek aisi super power hai jisey istemaal karne waala dushman ki koi bhi technique keval dekhkar hi seekh sakta hai. Iski khaasiyat ye hai ki iske istemaal se koi bhi Ninjutsu ya Genjutsu copy karke dushman ka taaqatwar waar usi par istemaal kar sakte hai. Iski kamjori sirf ek hai aur wo hai ki iske istemaal se dushman ki physical taaqat copy nahi ho sakti matlab ki agar aapke shareer me uss jutsu ko karna ka dum nahi hai jo Sharingan ne copy kiya hai to aapko issey koi faayda nahi hone waala.

Attack On Titan - Titan Transformation

Iske baare me kuchh bhi kehna ek bahot hi zordaar spoiler dena hoga isliye agar aapne ye anime ya movie abtak nahi dekhi hai to please aagey naa padhe!

Spoiler Alert! 

Kisi ko bhi umeed nahi thi ki ye hoga par ye hua aur jab hua to sabko upar se neeche tak hila daala tha. Insaaniyat poori tarah se haarne waali thi jab iss roop ne ek nayi umeed jaga di aur beshak Female Titan se hue battle ko koi bhi nahi bhula sakta kyuki uska scale tha hi itna epic. Pehle to shaayad hi koi hoga joki Attack On Titan ki duniya me rehna chahega par agar kabhi galti se fas bhi gaye iss duniya me apne kisi nightmare me jaisa ki mere saath hua tha to mujhe nahi lagta ki aap chahoge ki ye shakti aapke pass naa ho. Aur uss duniya ke bhayaanak rakshasho ke beech jo iss roop ne nayi umeed laa di haina wahi banaati hai iss shakti ko ek laayak contender iss list me. Attack On Titan fanboys beshak isey hi vote denge iske dhaasupane ke liye.

One Punch Man - One Punch

Sirf ek mukke ki hai jeet ek ke baad ek! Ji haa sirf ek mukka! Abtak koi bhi Saitama ka dusra mukka khaane ke liye bacha hi nahi! Wo to bechaara khud talaash me hai kisi taaqatwar bande ki jo usey takkar de sake. Aur agar aapko lagta hai ki ek aise taklay, chutiya se dikhne waale hero ka anime dekhne me maza nahi aayega joki ek hi mukke me apne dushmano ko haraa sakta hai to aap itna jyada galat ho ki mai kya bataau. 2015 ka sleeper hit ye anime ekdum kamaal ka hai aur iske hero ka zordaar mukka, uska to jawaab hi nahi. Mai ye yakeen se keh sakta hoo ki ye anime Dragon Ball Super se bhi behtar hai par afsos abhi sirf 12 episodes hi aaye hai. Halaaki Season 2 confirmed hai aur agar koi hero ek hi mukke me sabko dher kar sakta hai to uski power top super power ki list me to aani hi aani hai isliye iss maamle me behes ki zaroorat hi nahi.

Dragon Ball Super - Super Saiyan Blue Transformation

Goku ka legend to har anime fan ko pata hoga. Uski amazing journey jisme wo ek bewkoof maasoom bachche se badaa hoke poore Universe ka sabse taaqatwar jeev banne ki kosis me rehta hai itni kamaal ki hai ki sabka dil jeet hi leti hai. Uske safar me kai badlaav aaye jinme Super Saiyan roop sabse mashoor hai jiska sabse naya version hai Super Saiyan Blue. Kai log isey kehte hai Super Saiyan God Super Saiyan (Ssgssj) aur kuchh log isey Super Saiyan Beyond God kehte hai par ab officially isey Super Saiyan Blue kaha jaane laga hai Dragon Ball Super ki manga me bhi iska yahi name tha. Iss roop me devtaao se bhi badkar taaqat hai aur har Goku fanboy iski taaqat ka scope samajh hi sakta hai isliye jyada detail me jaane ki koi zaroorat nahi. Aur pehle hi hum sab jaante hai ki iske iss list  me hone bhar se sabko laghbagh pata chal hi gaya hoga ki winner kon hoga par kya pata iss baar kuchh alag ho jaaye kyuki list ke baaki daavedaar bhi kam nahi.

Apne favorite super power ko jitaane ke liye voting karne ke liye abhi visit kare ye link -

Winner is Super Saiyan Blue Transformation, thanks for voting.

Inme se konsi hai aapki favourite Anime Superpower?